خبر:

مسکان خان هغه نجلۍ ده چې د افراطي هندوانو له خوا حجاب ته د سپکاوي پر وړاندې ودرېده؛ نوموړې په کرناټکا کې د مهاتما ګاندي میمریل کالج زده کوونکې ده. سرچینه: (The News)

تبصره:

موږ د عمران او باجوه یوه بله جينايي چوپتیا په داسې وخت کې وينو، چی د هند حکومت په دې هېواد کې د مسلمانانو پر وړاندې سخت اقدامات پیل کړي دي. په کرناټکا کې يوه ځوانه نجلۍ د اسلام د دفاع جرأت کولى شي، خو د اسلامي نړۍ پراشوټي واکمنان چوپ دي؛ دوى باید د دې بې غيرتۍ له امله بنګړي واچوي. دا په داسې حال کې ده چې دهندوستان غوا پرسته هندوانو په سياسي ډول کشمیر له لاسه ورکړی دى. هغه څه چې د "مودي" په لاس کې دي؛ فزیکي عملیات دي، چې له ملیونونو هندي ځواکونو سره، سره بيا هم ناتوانه دی، چې په کشمیر کې مسلمانان ارام کړي. دلته د عمران او باجوه حکومت په عمده توګه ځیني ټکي له پامه غورځوي، ځکه دوی يوازې لاپې وهي، اقدام نه کوي او دا حالت له غوا پرستانو سره لويه مرسته کوي. که په دوى کې له مسلمانانو څخه د دفاع غيرت نه وي؛ نورو مجاهدینو ته خو دې اجازه ورکړي، چې په آزادانه ډول د پولې په اوږدو کې تګ راتګ وکړي.

په کشميري وروڼو د ظلم دوام نور نه شو زغملی، په ۱۹۴۸م، کې موږ کولی شول چې آزاد کشمير تر خپلې ولکې لاندې راولو او دا زموږ مکلفيت وو، چې داسې مو کړي وای؛ خو پاکستاني حکومت د ملګرو ملتونو احترام وکړ او پايله يې دا شوه، چې امريکايانو پاکستانی پوځ د ځينو تړونونو او قوانينو له امله دې ته اړ کړ چې د کشمير د دښمنانو پر ځای خلافت غوښتونکي وځپي. په سيمه کې چين هم د يوه قوه لوبغاړي حالت خپل کړی؛ پاکستاني حکومت کولی شي چې د چين او امريکا تر منځ له اختلافاتو څخه د اسلامي امت په ګټه کار واخلي، خو دوی دا کار نه کوي، په ډېره بې شرمۍ سره يوازې د هند ضد شعارونه ورکوي او وايي چې هند ظالم دی، هند د پاکستان داخلي نظم د افغانستان له لارې خرابوي، هند په ملګرو ملتونو کې د APS تر شاه د پاکستان ضد دوسيې وړاندې کوي... په ياد ولرئ چې حق غوښتل کېږي نه، بلکې په زور اخيستل کېږي. په کشمیر کې د هندي محاصرې نږدې اته سوه ورځې کيږي؛ په دې موده کې د بُت پرستو ظلمونه اوج ته رسېدلي، په زرګونو مسلمان يې شهيدان کړي، په زرګونو نورو ته يې بې عزتي اړولې. ټوله نړۍ پرې خبره ده، خو د ظلم پلوي کوي. پاکستاني حکومت د کشمیر د آزادۍ پر ځاى هندوانو ته بيا، بيا مهلت ورکوي او له خپلو خلکو څخه يوازې په غولونکو شعارونو ځان خلاصوي. شعارونه، مناظرې او خبرې د "مودي" حکومت وحشیانه ظلمونه نور هم زیاتوي، هندوانو د پاکستاني دولت پر وړاندې شديده رواني، سیاسي، پوځي او د نسل وژنې جګړه پیل کړې. هندوان څه کوي او موږ څه کوو؟؟ په دې سره مو حيثيت خرابېږي، چې د کشمیر غوندې مسایلو ته د خبرو لار لټوو، تاريخ ګواه دی چې د کشمیر غوندې لانجې هېڅکله په خبرو نه دي حل شوي. په افغانستان کی هغه وخت امریکا له مجاهدینو سره خبرو ته اړ شوه، چی کله یې د تاریخ تر ټولو اوږده جګړه د طالبانو پر وړاندې وبايلله. اوسنی حکومت هم د امريکا په برخليک اخته کېدونکی دی، ځکه د بُت پرستانو پروړاندې هېڅ نه شي کولی، په قصدي ډول يې د نړیوال بانک پروګرامونه منلي او د FATF له لارې يې تش او په بې معنا ډول زموږ لاسونه تر شاه تړلي دي، زموږ زمريان په غوا پرستانو باندې هر ډول بریدونو ته چمتو دي، خو تر هغو پورې کشمير نه شي ژغورلی، تر څو پورې چې د خلافت دولت نه وي رامنځ ته شوی، لکه څرنګه چې محمد بن قاسم غوندې اووه لس کلن ځوان د خلافت تر چتر لاندې بريالی شوی و او د الله تعالی بنده ګان يې د بنده له بندګۍ خلاص کړي وو او د الله بندګۍ ته يې رابللي وو؛ زموږ زمريان هم دا کار کولی شي، يوازې خلافت ته اړتيا ده، خلافت ته!

کله چې فساد او ظلم اوج ته ورسېږي، ظالم د دې احساس وکړي چې هر څه زه کولی شم، له ما پرته څوک نه شته چې څه وکړي، مظلوم خپل ټول حواس وبايلي او د آسمان پر لوري بې اختياره خپل لاسونه لپه کړي؛ وپوهېږئ چې په دې وخت کې لوی بدلون حتمي راځي او همدا د بريا لومړنۍ شيبې دي.

د نبوت پر بنسټ راشده خلافت کول کولی شي چې دې ټولو ستونزو ته د پای ټکی کېږدي؛ اې وروڼو! تر بل هر وخت راشده خلافت ته نږدې شوي يو، د بيا تأسيس لپاره يې تر بل هر وخت زيات کار وکړئ!

رسول الله صلى الله عليه وسلم فرمايلي دي:

«إنما الإمام جنة يقاتل من ورائه ويتقى به»

ژباړه: امام ډال دى؛ ساتنه کوي او تر شاه يې جګړه کېږي.

د حزب التحریر مرکزي مطبوعاتي دفتر ته

لیکنه: محمد عادل

ژباړه: حمزه صدیقي